Fleiri stelpur vantar í forritun

Forritunarkeppni framhaldsskólanna var haldin í sjötta skipti um síðustu helgi á vegum tölvunarfræðisviðs Háskólans í Reykjavík. Keppt var í þremur deildum, Alfa, Beta og Delta, og tóku átján lið þátt frá tíu framhaldsskólum.

Lið Iðnskólans í Reykjavík, Titus Livy, hlaut fyrstu verðlaun í Alfa-deildinni, sem er fyrir þá sem eru lengst komnir. Var liðið skipað þeim Guðna Þór Guðnasyni, Magnúsi Skúlasyni og Eyþóri Sigmundssyni. Frumlegustu lausnina hlaut The Union frá Fjölbrautaskóla Suðurlands. Keppendur völdu flottasta lógó liðanna og var það 3Minds frá Iðnskólanum í Reykjavík sem hlaut þau verðlaun.

„Þetta gekk rosalega vel. Það er gaman að sjá hvað áhuginn er mikill fyrir þessari keppni," segir Hrund Steingrímsdóttir, markaðsfulltrúi hjá Háskólanum í Reykjavík. „Kannski verður þessi keppni til að virkja forritunarkennslu í framhaldsskólum landsins sem virðist vera dálítill skortur á. Það skiptir miklu máli að kennararnir nái að virkja nemendurna," segir hún.

Samhliða forritunarkeppninni var haldin lógókeppni. 25 lógó voru send inn og hlaut Arnar Már Hall Guðmundsson fyrstu verðlaun. Verður lógóið hans notað sem hluti af kynningarefni keppninnar skólaárið 2007-2008. Hörður Helgi Tryggvason lenti í öðru sæti og Margrét Lára Höskuldsdóttir í því þriðja. Þau eru öll nemendur af upplýsinga- og fjölmiðlabraut Iðnskólans í Reykjavík.

Aðeins tvær stelpur tóku þátt í keppninni í þetta sinn. „Þetta er svolítil strákakeppni en við viljum fá fleiri stelpur. Það er spurning hvað þarf að gera til að virkja stelpur. Kannski þarf að breyta ímynd forritarans. Það eru margir sem hugsa að tölvunarfræði sé bara forritun en það er svo margt annað í henni. Síðan er til þessi ímynd að forritari sé sveittur karl úti í horni í netabol að drekka kók en það er ekki ímyndin sem við viljum hafa," segir Hrund.