Poppstjarna og pönkari saman í skóla

Tónlistarstefnurnar sem söngvararnir Birgitta Haukdal og Óttarr Proppé aðhyllast eiga sjaldan samleið. Birgitta og Óttarr eiga þó sitthvað sameiginlegt, og leggja nú bæði stund á markaðsfræði við Háskólann í Reykjavík.

„Við vorum saman í tímum fyrir áramót líka. Við erum mjög samstiga í þessu,“ sagði Birgitta. Hún syngur enn mikið, og kemur fram bæði ein og með Stuðmönnum. „Ég er í þessu með öðrum verkefnum, svo ég er alls ekki í fullu námi,“ sagði Birgitta. „Þegar Írafár fór í hlé myndaðist smá pláss fyrir eitthvað nýtt, og ég ákvað að bæta einhverju nýju í reynslubankann. Þetta tengist líka öllu sem ég hef verið að gera síðustu ár,“ bætti hún við.

Óttarr Proppé, sem er vörustjóri erlendra bóka hjá Pennanum-Eymundsson, er ekki heldur alsestur á skólabekk. „Þetta er bara smá upplyfting með vinnu,“ sagði Óttarr, sem sagði þau Birgittu allsendis ekki vera stjörnurnar í bekknum. Hann hefur í gegnum tíðina vakið athygli fyrir frumlegan klæðaburð á sviði, og meðal annars komið fram í bleikum leggingsbuxum. Hann sagðist þó passa prýðilega inn í umhverfi HR. „Það er eiginlega mesta furða. Það virðist vera pláss þarna jafnt fyrir poppstjörnur og gamla pönkara,“ sagði hann sposkur.

Óttarr útilokaði ekki að bekkjarfélagarnir fengju að njóta tónlistarhæfileika samnemenda sinna. „Ef við fáum nógu góða einkunn troðum við kannski upp í lokapartíinu.“