Slúðurblað í Suður-Ameríku áhugasamt um Höllu

Argentíska blaðið Gente sem þýðir á hinu ylhýra Fólk birtir frétt um félagana Gael Garcia Bernal og Jude Law. Báðir áttu þeir það sameiginlegt að hafa verið viðstaddir afhendingu frönsku kvikmyndaverðlaunanna Cesar þar sem Bernal fór tómhentur heim en Law var heiðraður fyrir framlag sitt til kvikmyndagerðar.

En blaðamaðurinn argentíski upplýsir lesendur sína jafnframt um annan leyndardóm úr lífi Law sem áður hefur komið fram í heimspressunni og skrifar: „Al parecer, tiene nueva novia, Halla Vilhjalmsdottir, conductora de la tevé islandesa," sem útleggst á íslensku: „Virðist sem hann eigi nýja kærustu, Höllu Vilhjálmsdóttur, þáttastjórnanda í íslensku sjónvarpi." Fréttablaðið hafði samband við Höllu vegna málsins en hún tjáði blaðamanni að ef umræðuefnið snérist ekki um vinnuna myndi hún ekki tjá sig og gaf lítið fyrir þær hugmyndir að fara til Suður-Ameríku og herja á hinn ört vaxandi sápuóperumarkað í kjölfar þessa. „Ég ræði ekki um mitt einkalíf," sagði Halla og þar við sat.

Gente er ógnarstórt blað í Argentínu og er upplag þess margfalt á við það sem blöð á borð við Hello eru gefin út í. Það er samblanda af íslensku tímartitunum Nýju lífi og Séð og heyrt en á forsíðu umrædds blaðs er Susana Gimenez, ein vinsælasta sjónvarpstjarna landsins, en hún er að byrja með nýja þáttaröð í argentíska sjónvarpinu.

Fréttablaðið greindi frá kvöldverði Höllu og Judes Law á Dómó um miðjan febrúar og fór fréttin víða, rataði meðal annars inn á síður breska götublaðsins The Sun. Law var staddur hér í stuttu fríi ásamt börnunum sínum þremur og barnapíu og skellti sér meðal annars í sund og á skauta eins og frægt er orðið. Af Law er það síðan að frétta að hann er um þessar mundir orðaður við bandarísku glamúrgelluna Lindsay Lohan og sannast þar hið fornkveðna, að Law er ekki við eina fjölina felldur.