Mills og McCartney ná loks sáttum

Það hillir undir endalok skilnaðardeilu Paul McCartney og Heather Mills en breska sunnudagsblaðið News of the World greinir frá því að þau hafi náð samkomulagi.

Samkvæmt frétt News of the World hefur Paul McCartney lagt fram tilboð sem hljóðar upp á 29 milljónir punda; tæpa fjóra milljarða íslenskra króna. Mills verða boðnir rúmir þrír milljarðar í eingreiðslu auk þess sem hún fær glæsivillu þeirra í St. John's Wood í London. News of the World hefur áður greint frá sáttaumleitunum McCartney því í janúar var hann sagður hafa boðið Mills 32 milljónir punda, eða rúma fjóra milljarða, auk tveggja húseigna.

Má fastlega gera ráð fyrir að lögfræðingar McCartney meti dæmið þannig að vel hafi gengið í dómsölum undanfarnar vikur og að Mills hafi gert sér grein fyrir því að ef málið drægist á langinn gæti hún misst alla möguleika á að fá einhverja aura úr búi McCartney. Þá er jafnframt talið að Heather hafi látið undan í forræðisdeilunni yfir Beatrice, fjögurra dóttur þeirra. Vinum og vandamönnum Mills og McCartney ber ekki saman um hvort standi uppi sem sigurvegari. Úr herbúðum Mills heyrist sá orðrómur að McCartney vilji þagga niður í Mills í eitt skipti fyrir öll og koma í veg fyrir að hún leggi fram sannanir um heimilis­ofbeldið sem fyrirsætan hafi mátt þola. Starfsmenn McCartney láta hins vegar hafa eftir sér að Mills hafi gert sér grein fyrir fégræðgi sinni, hún hafi lítið sem ekkert til síns máls og að þess vegna vilji hún loksins ganga að samningaborðinu. „Lögfræðingar þeirra beggja hittast reglulega utan réttarsalsins og reyna til hins ítrasta að komast að samkomulagi," er haft eftir heimildarmanni News of the World.

Blaðið hefur eftir nánum vini bítilsins fyrrverandi að hlutirnir hafi tekið óvænta stefnu síðustu daga. Fyrst hafi Mills viljað fá svimandi háar upphæðir og fullt forræði yfir Beatrice. „Núna reiknum við hins vegar með því að semja við hana," lét þessi ónafngreindi maður hafa eftir sér. Innanbúðarmaður úr herbúðum Mills sagði hins vegar að Mills liti ekki á samkomulagið sem einhverja þöggun fyrir sig. Hún ætli sér að greina frá ofbeldishneigð og áfengisdrykkju Pauls. „Ég vil að breska þjóðin heyri sannleikann um Paul og hegðun hans," er haft eftir Mills.

Þrátt fyrir að hjónakornin fyrrverandi hafi getað haldið ró sinni frammi fyrir dómara hefur blaðið eftir heimildarmönnum sínum að fúkyrðin gangi enn á milli. „Ég get ekki beðið eftir því að þurfa aldrei aftur að sjá smettið á þér," er Paul sagður hafa öskrað í síma en Mills ku hafa svarað að bragði: „Þú losnar aldrei við mig." Paul hefur jafnframt sagt við vini sína að hann búist við því að Mills eigi eftir að daga uppi sem einskisnýt raunveruleikaþáttarstjarna og líkti henni við Önnu Nicole Smith.