Stílistar í uppsveiflu á Íslandi

EMM School of Makeup stendur fyrir námskeiði fyrir upprennandi stílista næstu tvær helgar. Sóley Ástudóttir, einn eigenda Emm, segir námskeiðið vera það eina sinnar tegundar hér á landi. „Ef það er eitthvað kennt, er það samt ekkert í líkingu við það sem Anna Clausen gerir hjá okkur,“ sagði hún. Anna, sem kennir námskeiðið, er mikill reynslubolti í stílistabransanum.

Hún lærð í London College of Fashion og hefur jafnframt kennt í hinum virta Central St. Martins skóla í London. „Hún er búin að stílisera allt mögulegt, fyrir iD og Kylie Minogue og Sugababes, svona til dæmis,“ sagði Sóley. Emm hefur áður haldið tvö námskeið í stíliseringu og segir Sóley fjölda fyrirspurna hafa borist til skólans vegna þeirra. „Þau námskeið voru miklu lengri, dýpri og flóknari. Þetta er meira svona beint í æð. Það er kennt föstudag til sunnudags, tvær helgar í röð,“ sagði Sóley.

Á námskeiðinu verður farið yfir tískustrauma jafnt sem hátísku, og nemendur fá tilsögn í hárgreiðslu og förðun. „Þetta er rosalega sniðugt fyrir alla sem hafa áhuga á, eða eru að læra eitthvað tengt fatahönnun, stíliseringu eða förðun,“ sagði Sóley, og bendir á heimasíðuna emm.is fyrir nánari upplýsingar. Hún kveðst hafa orðið vör við síaukinn áhuga á starfi stílista. „Þetta hefur verið mjög ósýnilegt starf.  En á bak við allar auglýsingar sem maður sér, sjónvarpsþætti eða myndatökur, er alltaf stílisti. Þetta er mikil vinna og mikið af kláru fólki í þessu,“ sagði hún.