Dorrit heiðursgestur í London

„Þetta var frábær ferð og ég naut þeirra forréttinda að vera með stórum og skemmtilegum hópi kvenna,“ segir Margrét Sverrisdóttir stjórnmálamaður á heimasíðu sinni um eftirminnilega ferð til London í vikunni.

Margrét var þar í hópi hundrað þekktra kvenna sem allar eiga það sameiginlegt að teljast áhrifakonur í atvinnulífinu. Konurnar voru á vegum Exedra sem er skilgreint sem vettvangur umræðna þessara áhrifakvenna sem koma meðal annars úr viðskiptum, stjórnmálum, menntamálum, fjölmiðlum og listum.

Það var á þriðudagsmorgun sem lagt var upp í ferðina en einhverjar bættust við úti í London. Í hópnum voru meðal annarra sjónvarpskonurnar Eva María Jónsdóttir, Jóhanna Vilhjálmsdóttir og Sigríður Arnardóttir, Valgerður Sverrisdóttir utanríkisráðherra, Guðfinna Bjarnadóttir, fyrrum rektor HR, og arftaki hennar Svafa Grönfeldt. Auk þess var lögfræðingurinn Kristrún Heimisdóttir með í för og athafnakonurnar Kristín Ólafsdóttir og Unnur Sigurðardóttir. Heiðursgesturinn var svo sjálf Dorrit Moussaieff forsetafrú.

Hópurinn gisti á glæsihóteli í London eina nótt og stíf dagskrá var á meðan dvölinni stóð. Við komuna var haldið í hádegisverð þar sem framámenn úr íslensku útrásinni héldu fyrirlestra um starf fyrirtækja sinna á erlendri grundu. Þarna voru fulltrúar frá Bakkavör, Glitni, Kaupþing, Landsbankanum og FL Group, en það var sjálfur forstjórinn, Hannes Smárason, sem mætti á svæðið.

Mjög góður rómur var gerður að máli Hannesar og því hvernig hann kom fyrir, enda talaði hann blaðalaust og var mjög alúðlegur. Hafði ein viðstaddra á orði að þarna hefði Hannes breytt áliti um 100 kvenna á sér á svipstundu. Sjálfur lét Hannes þau ummæli falla í ræðunni að þegar hann stæði fyrir framan hóp allra þessara kvenna skildi hann vel hvernig konum liði í viðskiptalífinu.

Að vel heppnuðum hádegisverði og umræðum loknum var hópurinn í heild sinni fluttur í tískuverslunina Karen Millen. Versluninni var sérstaklega lokað fyrir íslensku konurnar og allar fengu þær 50% afslátt. Óhætt er að segja að það hafi mælst ágætlega fyrir.

Klukkan 17 var móttaka hjá sendiherranum en kvöldverður var svo snæddur í Natural History Museum. Þar var sungið og dansað fram á nótt en meðal skemmtikrafta var Garðar Thór Cortes. Íslensku konurnar 100 sneru svo til síns heima seinnipartinn á miðvikudag.- hdm