Kærður fyrir manndráp

Lane Garrison, sem leikur í spennuþáttunum Prison Break, hefur verið ákærður fyrir manndráp og fyrir að aka undir áhrifum áfengis þegar bíll hans lenti í árekstri á síðasta ári. Sautján ára piltur lést í slysinu og tvær fimmtán ára stúlkur slösuðust.

Garrison, sem er 26 ára, á yfir höfði sér sex ára og átta mánaða fangelsi verði hann fundinn sekur. Hann má ekki aka bíl, drekka áfengi né fara á bari á meðan hann bíður eftir réttarhöldunum.

Þættirnir Prison Break fjalla um fanga á flótta undan réttvísinni og því þykir það nokkuð kaldhæðnislegt að Garrison sé nú hugsanlega á leiðinni í steininn.