Valentino þeytir skífum í afmæli

Slóvenski plötusnúðurinn Valentino Kanzyani þeytir skífum á Nasa í kvöld í tilefni af tveggja ára afmæli techno.is. Valentino kemur fram með þrjá plötuspilara og spilar það ferskasta í danstónlistinni um þessar mundir. Einnig koma fram Exos og Plugged, sem áttu toppsæti árslista techno.is árið 2006 með endurhljóðblöndun sinni af laginu Kokaloca með Dr. Mister and Mr. Handsome.

„Valentino er einn af þeim allra bestu í Evrópu. Hann er búinn að ferðast um allan heim og hefur verið mjög áberandi upp á síðkastið. Við notuðum tækifærið og fluttum hann inn því hann er uppáhaldsplötusnúður techno.is. Við vildum gera þetta spes fyrir okkur út af afmælinu,“ segir Addi Exos.

Eitt af sérkennum Valentino sem plötusnúður er að samkeyra tvö lög í einu þannig að við hverja skiptingu hljómi ávallt tvö lög. Hann spilar jafnan á öllum stærstu techno-hátíðum heimsins. Forsala miða fer fram í All Saints. Miðaverð er 1.000 krónur í forsölu en 1.500 við inngang.