Alcan braut persónuverndarlög

Íbúakosning var í Hafnarfirði í mars um það hvort stækka ætti álver Alcan. Í aðdraganda kosninganna kom í ljós að Alcan hafði fengið starfsmenn félagsins til þess að safna upplýsingum um afstöðu að minnsta kosti tíu nágranna sinna eða vina til stækkunar álversins. Var upplýsingunum komið í sérstakan gagnagrunn.

Persónuvernd rannsakaði málið en Alcan vísaði því á bug að félagið bæri ábyrgð á vinnslu persónupplýsinga og því bæri félaginu ekki að veita tilteknar upplýsingar í málinu. Stjórn Persónuverndar komst hins vegar að því að Alcan væri ábyrgðaraðili vinnslunnar þar sem félagið hefði ákveðið að afla upplýsinganna og að starfsmenn félagsins söfnuðu þeim.

Gögnum eytt þrátt fyrir fyrirmæli um annað

Óskaði Persónuverd í framhaldinu eftir aðgangi að upplýsingum í gagnagrunninum til þess að geta skorið úr um það hvort upplýsingarnar hefðu verið rekjanlegar til einstakra manna. Þau svör fengust hins vegar í haust að öllum gögnum í málinu hefði verið eytt í sumar.

Það var gert þrátt fyrir að Alcan hefði sent þeim aðila sem vann gagnagrunninn fyrir Alcan tölvupóst um að ekki mætti eyða gögnum sem kynnu að varpa ljósi á málið. Hins vegar er bent á í úrskurði Persónuverndar að Alcan hafi ekki fengið sérstakt bréf þar sem áréttað var að ekki mætti eyða gögnunum. Því telur Persónuvernd að ekki verði fullyrt hvort upplýsingarnar hafi rekjanlegar til starfsmanna.

Persónuvernd komst hins vegar að því að Alcan hefði brotið gegn lögum um persónuvernd með því að greina þeim sem upplýsinga var aflað um ekki frá því að svör þeirra yrðu skráð.