Tjá sig ekki um málefni einstakra starfsmanna OR

Borgarfulltrúar Sjálfstæðisflokksins hyggjast ekki tjá sig um málefni einstakra starfsmanna Orkuveitunnar, að sögn Gísla Marteins Baldurssonar, formanns borgarstjórnarflokks sjálfstæðismanna.

DV segist hafa heimildir fyrir því að borgarfulltrúar Sjálfstæðisflokksins vilji ekki sjá Guðmund Þóroddsson aftur í forstjórastól Orkuveitunnar vegna málefna Reykjavik Energy Invest. Hann er sem stendur í launalausu leyfi þar sem hann sinnir nú starfi forstjóra REI sem upphaflega átti að vera útrásararmur Orkuveitunnar en hefur nú sameinast Geysi Green Engergy.

„Við tjáum okkur ekki um einstaka starfsmenn Orkuveitunnar. Okkur finnst það ósmekklegt," segir Gísi Marteinn í samtali við Vísi og segir frétt DV vera getgátur. Borgarfulltrúar Sjálfstæðisflokksins töluðu um trúnaðarbrest milli þeirra og lykilstjórnenda Orkuveitunnar á blaðamannafundi á mánudag en Gísli Marteinn vildi ekkert segja um það hvort sá trúnaðarbrestur hefði afleiðingar fyrir lykilstarfsmenn Orkuveitunnar. Málið yrði rætt áfram.

Aðspurður hvort ekki hefði líka orðið trúnaðarbrestur á milli sjálfstæðismanna og Björns Inga í ljósi þess að Björn Ingi sæti bæði í stjórn Orkuveitunnar og REI sagði Gísli Marteinn að trúnaðarbresturinn hefði orðið á milli starfsmanna Orkuveitunnar og borgarfulltrúa, Björn Ingi væri ekki starfsmaður Orkuveitunnar.

Þá sagði Gísli aðspurður að ekki væri búið að finna eftirmann Hauks Leóssonar í stjórn Orkuveitunnar en meðal þess sem fólst í sátt sjálfstæðismanna á mánudag var að Haukur viki úr stjórninni og að borgarfulltrúi settist þar inn.

Meirihluti sjálfstæðismanna og framsóknarmanna í borginni fundar nú í hádeginu. Þar verður farið yfir málin fyrir aukafund í borgarstjórn í dag þar sem rætt verður um málefni REI og Orkuveitunnar.