Magnús hafði betur í Gettu betur einvíginu

Magnús Lúðvík Þorláksson lagði Baldvin Má Baldvinsson í æsispennandi viðureign í Meistaranum í gærkvöld. Magnús Lúðvík er þar með kominn í átta liða úrslitin en þangað eru komnir þeir Páll Ásgeir Ásgeirsson og Helgi Árnason.

Báðir eru þeir Magnús og Baldvin Gettu betur-kempur. Baldvin Már var í sigurliði Borgarholtsskóla árið 2005 en Magnús Lúðvík er í liði MR sem einmitt er komið í átta liða úrslit í Gettu betur – spurningakeppni framhaldsskólanna. Sannkallað spurningaljón þar á ferð. Magnús og Baldvin eru yngstu keppendur í Meistaranum.

Magnús náði fljótlega nokkurra stiga forskoti og hélt því allt þar til í lokin. Þá var staðan skyndilega orðin jöfn, 16–16, og Baldvin í aðstöðu til að stela sigrinum. En hann átti ekki svar við lokaspurningunni sem þýddi mínus-stig og tap.

Næsta viðureign er svo milli alfræðiorðabókarinnar Illuga Jökulssonar ritstjóra og Bryndísar Sveinsdóttur, nema og blaðamanns. -