Fyrsta opinbera pókermótið á Íslandi um helgina

Fyrirhugað er að halda fyrsta opinbera pókermótið á Íslandi um helgina. Mótið er haldið á vegum gismo.is, verslun á netinu sem selur vörur sem tengjast fjárhættuspilum. Samkvæmt almennum hegningarlögum eru fjárhættuspil bönnuð á Íslandi. Forsvarsmenn mótsins telja sig þó ekki vera að brjóta lög.

“Við teljum okkur ekki vera að brjóta lög en það getur verið að einhverjir aðrir túlki það á annan hátt,” segir Sindri Lúðvíksson, hjá gismo.is. “Við ætlum fyrst og fremst að nota mótið sem auglýsingu fyrir síðuna okkar.”

Samkvæmt almennun hegningarlögum getur sá sem hefur atvinnu af fjárhættuspilum eða kemur öðrum til þátttöku í þeim þurft að sæta sektum eða fangelsi, allt að einu ári. Sömu viðurlög gilda um þann sem aflar sér tekna beint eða óbeint með því að láta fjárhættuspil fara fram í húsnæði sem hann hefur til umráða.

Sindri telur sig ekki vera að brjóta lög þar sem mótshaldarar hafa ekki fjárhættuspil að atvinnu né hafi beinar tekjur af mótinu.

“Þetta mót er alveg eins og golfmót eða önnur þar sem gjalds er krafist fyrir þátttöku. Þar rennur ákveðinn hluti gjaldsins til félagsins en hluti þess fer í vinninga,” segir Sindri. “Hjá okkur mun mótsgjaldið hins vegar fara óskipt til vinningshafana.”

Máli sínu til stuðnings bendir Sindri á pistil sem Jóhannes Stefán Ólafsson, mastersnemi í lagadeild Háskóla Íslands, birtir á heimasíðu sinni. Þar færir Jóhannes Stefán rök fyrir því hvernig hægt er að stunda fjárhættuspil á löglegan hátt.

Jóhannes Stefán segist hafa sent greinagerð sína á dómsmálaráðuneytið og starfsmenn þar hafi tekið undir rök hans. Ekki fengust svör frá dómsmálaráðuneytinu þegar Fréttablaðið leitaði eftir því í gær.