Allt er þá þrennt er

Britney Spears er komin í meðferð aftur. Söngkonan innritaði sig að þessu sinni á meðferðarheimili í Malibu eftir að fyrrverandi eigin-maður hennar, Kevin Federline, hótaði að svipta hana forræðinu yfir strákunum þeirra tveim, þeim Jayden James og Sean Preston.

Samkvæmt bandarískum fjölmiðlum óskaði Federline eftir skyndiréttarhöldum hjá barnadómstól í Los Angeles eftir að söngkonan hafði sýnt vægast sagt undarlega hegðun, skráð sig tvívegis í meðferð á einni viku en á milli þess rakað af sér hárið og látið húðflúra sig með tilþrifum. Talsmaður dómstólsins, Allan Parachini, lýsti því hins vegar yfir á fimmtudaginn að þeim hefði verið frestað af lögfræðingi K-Fed og er talið að eiginmaðurinn fyrrverandi hafi ákveðið að gefa Britney lokatækifæri til að bæta sitt ráð.

Frásögn breska blaðsins The Sun er ögn dramatískari en þar er sagt frá því að Britney hafi keyrt heim til Kevins og heimtað að fá syni sína. Þegar Federline kom ekki til dyra hafi söngkonan látið skapið hlaupa með sig í gönur og látið höggin dynja á ljósmyndara sem var í grenndinni. Að sögn sjónarvotta skakkaði Kevin leikinn og sagði við Britney: „Ef þú ferð í meðferð hætti ég við að fara til dómstóla.“ Britney ku hafa látið segjast og haft sig á brott og skráð sig í kjölfarið á meðferðarheimilið.