98 fangar dáið í haldi Bandaríkjamann í Írak og Afganistan

Tæplega 100 fangar hafa látið lífið í fangelsum Bandaríkjahers í Írak og Afganistan síðan í ágúst árið 2002. Fjölmargir þeirra munu hafa verið pyntaðir til dauða. Þetta kemur fram í nýrri skýrslu bandarísku mannréttindasamtakanna Human Rights First.

Greint var frá innihaldi skýrslunnar í fréttaskýringaþættingum Newsnight hjá breska ríkisútvarpinu, BBC, í gærkvöld. Skýrslan verður kynnt formlega síðar í dag. Hún byggir meðal annars á upplýsingum frá heimildarmönnum í bandaríska stjórnkerfinu.

Þar segir að 98 fangar hafi látist í haldi Bandaríkjamanna og þar af eru annað hvort staðfest eða grunað að 34 þeirra hafi verið myrtir. Önnur 11 dauðsföll eru sögð grunsamleg og talið er að á bilinu 8 til 12 fangar hafi verið pyntaðir til dauða. Talsmaður Human Rights First segist sannfærð um að upplýsingar samtakanna séu áreiðanlegar.

Sendiherra Bandaríkjanna í Írak sagði í viðtali við BBC að flestir bandarískir hermenn í Írak færu að lögum en því miður væru svartir sauðir inn á milli sem misþyrmdu föngum. Mikilvægt væri að draga þá menn fyrir dóm.

Talsmaður Amnesty International segir skýrsluna sláandi og mikilvægt að dauðsföllin verði rannsökuðu. Hann segur samtökin hafa vakið athygli á því að dómar yfir þeim sem gerðust sekir um brot sem þessi séu of vægir.

Fulltrúar bandaríska varnarmálaráðuneytisins segja ásakanirnar mjög alvarlegar, þær verði rannaskaðar og brotamenn sóttir til saka.