Stefna að því að einkafyrirtæki reki Keflavíkurflugvöll

Geir H. Haarde, utanríkisráðherra, telur rétt að stefna að því að einkafyrirtæki annist rekstur Keflavíkurflugvallar og félagið verði síðan einkavætt í framhaldinu. Hann telur ekki þörf á rannsókn hér á landi vegna uppljóstrana í skýrslu Amnesty International um fangaflug Bandaríkjamanna.

Utanríkisráðherra flutti í dag Alþingi skýrslu um utanríkismál. Þar fór hann yfir stöðu mála í heiminum og stefnu íslenskra stjórnvalda í hinum ýmsu alþjóðamálum. Hann fór þar meðal annars yfir stöðu mála í varnarviðræðunum við Bandaríkjamenn.

Í ræðu sinni vék ráðherra einnig að rekstri Keflavíkurflugvallar og sagði einsýnt að Íslendingar tekið við honum. Hann sagðist telja að stefna ætti að því að einkafyrirtæki annist rekstur vallarins eins og tíðkist annars staðar. Þá yrði stofnað hlutafélag í eigu ríkisins um rekstur flugvallarins, en ekki skuli látið staðar numið þar heldur yrði félagið einkavætt í framhaldinu.

Innlendum og erlendum fjárfestum yrði síðan boðinn þessi vænlegi fjárfestingarkostur. Ráðherra bætti því við að ekkert væri þó ákveðið í þessum efnum.

Össur Skarphéðinsson gerði Íraksstríðið að umræðuefni og spurði ráðherra hvort hann teldi ákvörðunina um stuðning við innrásina í Írak rétta í ljósi þess sem síðan hefði komið fram.

Sagði ráðherra að hann teldi þá ákvörðun, sem tekin var á þeim tíma, hafa verið rétta.

Össur spurði hvort ný skýrsla Amnesty International um fangaflug Bandaríkjamanna gæfi tilefni til rannsóknar. Ráðherra svaraði því til að ef slík rannsókn yrði gerð heyrði hún undir dómsmálaráðherra. Hins vegar teldi hann að skýrslan gæfi ekki tilefni til slíkrar rannsóknar. Vikið væri að Íslandi á einum stað í skýrslunni varðandi flugvél sem hefði lent hér á landi og ekki vitað hvort hún hefði verið að flytja fanga.