Stefnt að sameiningu Apple-verslana á Norðurlöndum

Öflun ehf., eigandi Apple-verslananna á Íslandi, í Danmörku og Svíþjóð, hefur gert yfirtökutilboð í norska fyrirtækið Office Line en nýverið eignaðist Öflun yfir 89,58% í fyrirtækinu.

Markaðshlutdeild Office Line er umtalsverð á Norðurlöndum þar sem fyrirtækið rekur Apple-verslanir í Noregi, Svíþjóð, Danmörku og Finnlandi. Velta félagsins á síðasta ári var tæplega 5 milljarðar íslenskra króna, eða um 425 milljónir norskar krónur. Rekstrarhagnaður þess var tæpar 182 milljónir íslenskra króna, eða um 16 milljónir norskra. Félagið er skráð í Kauphöllinni í Ósló.

Stefnt er að sameiningu Office Line og Öflunar og að því að taka Office Line af norskum hlutabréfamarkaði. Öflun rekur þrettán Apple-verslanir á Norðurlöndum m.a. í Reykjavík, Kaupmannahöfn, Ósló, Stokkhólmi og Helsinki. Gert er ráð fyrir að opna þrjár nýjar verslanir í vor og stefnt að auka sölu og þjónustu til fyrirtækja. Eftir sameininguna er áætlað að velta Öflunar verði um sjö milljarðar íslenskra króna á ári. Starfsmenn fyrirtækisins eru um tvö hundruð, þar af um tuttugu á Íslandi. Yfirstjórn félagsins mun hafa aðsetur hér á landi.

Fyrirtækjaráðgjöf Glitnis sá um ráðgjöf og annaðist fjármögnun við kaupin. Þetta er fyrsta samstarfsverkefni fyrirtækjaráðgjafar Glitnis í Reykjavík og Glitnir Securities (áður Norse Securites).