Stólalyftan í Suðurgili opin í Bláfjöllum á morgun

Á morgun verður Gosinn stólalyftan í Suðurgili í Bláfjöllum opin frá klukkan eitt eftir hádegi til klukkan fjögur. Snjór er í lágmarki og víða grunnt á grjót og því mun ekkert kosta inn á svæðið. Stjórnendur vilja með opnuninni koma á móts við harðasta fjallafólkið sem þekkir aðstæður og er tilbúið að leggja búnaðinn sinn að veði.

Göngubraut verður ekki lögð en hægt er að þræða hraunið sé varlega farið. Veitingasala og skíðaleiga verða lokaðar. Fólk er hvatt til að fara varlega og yfirmenn skíðasvæðisins benda á að engin aðstaða fyrir byrjendur verður opin á morgun.