Vill afnema bann á auglýsingum heilbrigðisstétta

Varaformaður Samfylkingarinnar segir lög um bann við auglýsingum heilbirgðisstétta og heilbrigðisstofnana úrelt og vill að slíkar auglýsingar verði heimilaðar til þess að upplýsa almenning betur um heilbrigðisþjónustuna. Hann óttast ekki að óljós mörk verði milli upplýsingagjafar og mikils markaðsstarfs í geirum og segir bæði samkeppnislög og siðareglur félaga setja kvaðir á menn.

Ágúst Ólafur Ágústsson, varaformður Samfylkingarinnar hefur lagt fram tillögu að þingsályktun um að heilbirgðisráðherra verði falið að undirbúa lagabreytingar sem heimili læknum, tannlæknum og öðrum heilbrigðisstarfsmönnum, svo og heilbrigðisstofnunum, að auglýsa þjónustu sína og starfsemi. Bannið var sett fyrir um 70 árum og Ágúst segir það ekki eiga við í dag. Hann segir bannið koma í veg fyrir eðlilega upplýsingagjöf til almennings um heilbrigðisþjónustu. Nú þurfi landsmenn að treysta á orðróm, ímynd og jafnvel umtal þegar komi að vali á heilbrigðisþjónustu. Málið lúti því að því að auka upplýsingagjöf til almennings.

Ágúst Ólafur segir hugmyndirnar fyrst og fremst ná til lækna og tannlækna, en tannlæknar hafi til að mynda frjálsa gjaldskrá. Þetta geti þó einnig auðveldað nýliðum að koma inn í heilbrigðisstéttirnar. Ágúst segir það mjög mikilvægt að hafa það í huga að þetta lúti ekki að einhvers konar markaðsvæðingu heilbrigðisþjónustunnar. Það eigi ekki að breyta greiðslukerfinu sem sé að langstærstum hluta í höndum hins opinbera. Ágúst bendir enn fremur á að þegar séu dæmi fyrir því að gjaldfrjáls þjónusta sé auglýst, t.d. framhaldsskólar.

En hvernig er með skilin milli upplýsingagjafar og markaðsstarfs, er ekki hætta á að þau verði óljós? Ágúst telur að það eigi að treysta læknum og öðrum heilbrigðisstéttum fyrir því að fara vel með þetta frelsi. Það sé ekki langt síðan lögmenn hafi fengið leyfi til að auglýsa. Þeir hafi farið mjög vel með það frelsi og að hans mati beri ekkert að óttast í þessum efnum. Þar að auki hafi nágrannaríkin mun frjálsari löggjöf í málinu en Ísland.