Stjórnarformaður Landsvirkjunar vissi ekki af skýrslu Gríms

Stjórnarformaður Landsvirkjunar vissi ekki af greinargerð Gríms Björnssonar jarðfræðings þegar ákvörðun um Kárahnjúkavirkjun var tekin í stjórn fyrirtækisins. Hann segir að aðeins "sérfræðingar fyrirtækisins" hafi fengið greinargerðina frá Orkustofnun.

Jóhannes Geir Sigurgeirsson, stjórnarformaður Landsvirkjunar, sagði í Íslandi í dag í kvöld að hvorki hann né aðrir stjórnarmenn í Landsvirkjun hafi fengið greinargerð Gríms fyrr en eftir að ákvörðun um gerð virkjunarinnar hafi verið tekin, á Alþingi og hjá stjórn Landsvirkjunar.

Fram hefur komið í fréttum NFS að skýrslu Gríms, sem bar heitið Kárahnjúkar sýnd veiði en ekki gefin, hafi ekki verið lögð fyrir Alþingi, þrátt fyrir að forstjóri Orkustofnunar hafi gert iðnaðarráðherra grein fyrir tilvist hennar.

Jóhannes sagði í Íslandi í dag að þó hann eða stjórn fyrirtækisins hefði ekki fengið greinargerðina, þá treysti hann þeim "sérfræðingum fyrirtækisins" sem þó hefðu fengið hana.

Hann kvaðst einnig undrast að Grímur Björnsson hefði ekki komið athugasemdum sínum á framfæri í umhverfismatsferli virkjunarinnar.