Vatnslitað af listfengi

Sumarsýning Listasafns ASÍ er helguð vatnslitamyndum en verk fjögurra listamanna sem spanna þrjár kynslóðir íslenskrar listasögu verða til sýnis. Einnig er fengur í sjaldséðum vatnslitaverkum listamannins Svavars Guðnasonar sem gestir sýningarinnar fá einnig notið í sumar.

Listamennirnir fjórir eiga það sameiginlegt að hafa fengist við vatnslitamálun um áratugaskeið og náð talsverðum árangri í glímunni við þennan vandmeðfarna miðil. Verk þeirra Eiríks Smith, Hafsteins Austmann, Kristínar Þorkelsdóttur og Daða Guðbjörnssonar eru að sönnu ólík en sýningin í heild veitir innsýn í möguleika miðilsins og þróun hans.

Daði Guðbjörnsson kveðst mjög ánægður með félagsskapinn og áréttar að kollegarnir sem sýna með honum í safninu séu "alveg toppurinn" meðal vatnslitamálaranna. "Þegar maður er kominn á miðjan aldur er líka voða gaman að fá að vera litla barnið í hópnum," segir hann kíminn. Verkin eftir Daða eru öll unnin á nýliðnum vetri. "Það sem er óvenjulegt við þessa sýningu er að verkin eru öll af hafinu - þetta eru sjómyndir," segir Daði en hafið hefur verið honum hugleikið lengi þótt hann hafi ekki bundið sig sérstaklega við það mótíf í list sinni. "Ég hef alltaf málað töluvert af myndum af hafinu og siglandi bátum og þessi stíll minn nýtur sín mjög vel í bylgjuhreyfingum."

Eiríkur Smith sýnir óhlutbundin verk sem skírskota til náttúrunnar en í þeim eru "eindregnar láréttar og lóðréttar áherslur, kannski ávæningur af láréttri jarðskorpu eða sjóndeildarhring" svo vitnað sé til ummæla um sýninguna. Vatnslitamyndir Hafsteins Austmann eru sagðar gæddar óvenju næmri tilfinningu fyrir núinu þar sem listamaðurinn gerir tilraunir með byggingu, hreyfingu og liti. Í umsögn um verk Kristínar er þess getið að þar megi finna sjaldgæfa virðingu fyrir rými og skilning á því að "þögn eða andrúm séu jafn máttug til miðlunar eins og flæði og hljóð".

Verk Svavars Guðnasonar á sumarsýningunni eru óhlutbundnar, ljóðrænar vatnslitamyndir sem ekkja listamannins, Ásta Eiríksdóttir, ánafnaði Listasafni ASÍ en þær myndir hafa sjaldan verið sýndar. Svavar var einn helsti brautryðjandi abstraktlistarinnar á Íslandi og segir Daði vatnslitamyndirnar vera mjög flottar og sérstakar og telur mikinn feng í sýningu þeirra nú.

Sýningin verður opnuð kl. 14 í dag og stendur til 13. ágúst en Listasafn ASÍ er opið alla daga nema mánudaga frá kl. 13-17, aðgangur er ókeypis.