Krefjast stefnubreytingar í umferðarmálum

Neytendasamtökin krefjast stefnubreytingar í umferðarmálum af hálfu ráðamanna landsins með það að markmiði að auka umferðaröryggi og fækka hörmulegum slysum og örkumlum á vegunum.

Fram kemur á vef samtakanna að þrátt fyrir gríðarlega áherslu á auglýsingar á árinu og á sama tíma og efnt er til átaks þar sem hátt í 40 þúsund manns hafi skrifað undir yfirlýsingu þar sem heitið er að bæta hegðun í umferðinni séu dauðaslysin jafn mörg og raun ber vitni, en þau eru alls 27 á árinu. Við dauðaslysin bætist svo þeir sem hafi slasast alvarlega og búi sumir við varanlega fötlun. Ekki verði unað við þetta ástand.

Þá segja samtökin það sorglegt að það skuli þurfa aðstandendur fórnarlamba umferðarslysa til að reka stjórnvöld til aðgerða en það hafi gerst bæði hvað varðar framkvæmdir við Keflavíkurveg og Suðurlandsveg. Samgöngur séu samfélagslegt verkefni og samgönguráðherra ætti að hafa það sem forgangsmál að mestu samgöngubætur eigi sér stað á fjölförnustu vegaköflum landsins þar sem slysin eru flest og alvarlegust. Ljóst sé að ekkert annað en tvær aðskildar akreinar í hvora átt komi til greina sem framtíðarlausn á helstu stofnbrautum landsins.