Framsókn biði afhroð yrði kosið nú

Samkvæmt greiningu sem gerð hefur verið fyrir Ríkisútvarpið á þingmannafjölda stjórnmálaflokkanna miðað við nýlega könnun Capacent, verður mikil breyting á fjölda þingmanna einstakra flokka. Framsóknarflokkurinn biði afhroð og tapaði 8 þingmönnum ef kosið yrði nú en hann hefur 12 þingmenn á Alþingi í dag. Frjálslyndi flokkurinn myndi tapa öllum sínum þremur þingmönnum, Sjálfstæðisflokkurinn myndi hins vegar bæta við sig sex þingmönnum en flokkurinn hefur 23 þingmenn nú, Samfylkingin tapaði fjórum þingmönnum en flokkurinn er nú með 20 þingmenn. Vinstri grænir ynnu hins vegar stórsigur, bættu við sig átta þingmönnum, en flokkurinn hefur fimm menn á Alþingi nú.