Nýtt afl og Frjálslyndir sameinast

Forystumenn Nýs afls og Frjálslynda flokksins hafa komist að samkomulagi um að sameina flokkana. Hefur forysta Nýs afls ákveðið að samtökunum verði breytt úr stjórnmálaflokki og hvetur stjórnin félagsmenn í Nýju afli til að ganga í Frjálslynda flokkinn. Þannig muni fólk í Frjálslynda flokknum og Nýju afli snúa bökum saman til öflugrar sóknar gegn misskiptingu í þjóðfélaginu, pólitískri spillingu og baráttu fyrir að náttúruauðlindir verði í almannaþágu og til nýtingar og eignar þjóðarinnar, eins og segir í tilkynningu.