Kalkþörunganámur endast í 500 ár

Kalkþörunganámur, sem fundist hafa á botni Arnarfjarðar, endast í fimmhundruð ár, miðað við afköst verksmiðjunnar sem brátt hefur störf á Bíldudal. Afurðin verður að mestu flutt úr landi og seld sem fæðubótarefni fyrir búpening.

Kalkþörungaverksmiðjan, sem er að rísa á Bíldudal, verður fyrsta fyrirtæki sinnar tegundar hérlendis. Heimamenn vonast til að með henni skapist tíu til fimmtán framtíðarstörf og að minnsta kosti fimm önnur afleidd störf.

Sanddæluskip Björgunar hafa fengið það verkefni að sækja kalkþörungasetið niður á botn Arnarfjarðar og skila því að verksmiðjunni.

Rannsóknir sýna að kalkþörungaset sem fundist hefur í firðinum nemur 21,5 milljón rúmmetra. Íslenska kalkþörungafélagið hefur starfsleyfi til fimmtíu ára sem miðar við að þá verði búið að taka um tíunda hluta þeirra kalkþörunga sem þarna finnast. Yrði leyfið framlengt miðað við sömu afköst myndu námurnar í Arnarfirði því endast í fimmhundruð ár.

Reyndar er aðeins gert ráð fyrir að óverulegur hluti seljist innalands. Megnið af afurðum kalkþörungafélagsins verður selt til útlanda.