Mótmælastaða undir kvöldið

Íslandsvinir, sem dvelja í mótmælabúðum undir Snæfelli, fóru í dag í göngu um það svæði sem fer undir Hálslón í haust. Þátttakendur í búðunum koma frá ýmsum þjóðum og eru margir mættir til að sýna andstöðu sína gegn Kárahnjúkavirkjun.

Íslandsvinir settu í gær upp búðir sínar undir Snæfelli og eru um áttatíu tjöld á svæðinu. Skipuleggjendur telja að á annað hundrað manns sé í búðunum og er fólk allstaðar að úr heiminum komið til að taka þátt í mótmælunum. Í morgun fór hópurin í göngu um það svæði sem fer undir vatn þegar byrjað verður að safna í lónið í haust.

Göngunni lýkur undir kvöldið og ætla Íslandsvinir þá að vera með mótmælastöðu þar sem landið sem fer undir lónið verður kvatt.