Bandaríkjamenn hefja niðurrif í vikunni

Fjölmennt lið Bandaríkjamanna, sem er sérþjálfað í niðurrifi herstöðva, kemur hingað til lands í vikunni til að rífa niður stjórnstöðvar hersins og fleira. Samkvæmt heimildum fréttastofunnar er um að ræða allt að 200 manna lið, sem meðal annars mun rífa niður tvær af þremur stjórnstöðvum hersins á Keflavíkurflugvelli. Eftir að þær stöðvar eru farnar mun verða illgerlegt að stýra átökum frá Keflavíkurstöðinni. Búnaðurinn verður fluttur til annarra herstöðva.

Hvorki bandarísk né íslensk stjórnvöld hafa gefið upp hvað verður eftir á Keflavíkurflugvelli eftir brottför hersins og undir hvaða stjórn, en ljóst er að Bandaríkjamenn eru þegar farnir að vinna eftir niðurrifs- og flutningsáætlun, hvort sem hún hefur verið kynnt íslenskum stjórnvöldum eða ekki. Þá munu vera til eldsneytisbirgðir fyrir orrustuþotur Bandaríkjamanna að verðmæti um tveir milljarðar króna á Keflavíkurflugvelli. Þetta eldsneyti gengur ekki á venjulegar farþegaþotur og því spurning hvort eldsneytið verði flutt af landi brott.

Mennirnir sem koma hingað til niðurrifs- og flutningsstarfa í vikunni hafa, samkvæmt heimildum NFS, unnið við svipuð störf í fjölda bandarískra herstöðva í Evrópu undanfarin ár. Friðþór Eydal, upplýsingafulltrúi varnarliðsins, segist ekki geta staðfest þessar upplýsingar fréttastofunnar.