Vaskasti uppvaskarinn í Fífunni

Keppnisskapið var allsráðandi í Fífunni í Kópavogi í dag þar sem bestu uppvaskarar landsins börðust um titilinn vaskasti uppvaskarinn. Keppnin er liður í stórsýningunni Matur 2006, en þar leiða einnig fjölmargir innlendir og erlendir matreiðslumenn saman hesta sína í fjölbreyttri keppni.

Sýningin hófst í gær en á henni kynna innlend matvælafyrirtæki starfsemi sína og framleiðslu. Keppnir af ýmsu tagi setja líka svip sinn á sýninguna og strax í gær reyndu matreiðslu- og framleiðslunemar með sér og matreiðslumaður ársins var valinn. Í dag héldu hátíðahöldin áfram þar sem meðal annars með forkeppni Íslandsmóts kaffibarþjóna og fagkeppni meistarafélags kjötiðnaðarmanna. Í þeirri síðarnefndu senda menn inn vöru með nafnleynd og það er dómara að skera úr um hvaða vara er best. Auk þess kepptu ungir matreiðslunemar á Norðurlöndum um titilinn Norðurlandameistari matreiðslunema.

Einna mesta athygli vekur hins vegar keppnin Vaskasti uppvaskarinn, sem haldin var í dag. Þar reyndu 14 bestu uppvaskarar landsins með sér, en þeir starfa á ólíkum vinnustöðum, allt frá Alcan til Skólabrúar. Í keppninni gilti að vera röskur en gæta þess þó að missa ekki neitt í gólfið, því slíkt gaf refsistig. Sigurvegarinn í keppninni fer ásamt fjórum öðrum, sem mynda landslið Íslands í greininni, til keppni á Norðurlandamótinu í uppvaski í næsta mánuði.

Sýningin er opin almenningi um helgina er þá verður meðal annars álfukeppni matreiðslumanna, ommilettukeppni og ostrukeppni. Matgæðingar ættu því að geta fundið eitthvað við sitt hæfi í Fífunni um helgina.