Gera kjarasamning við starfsmannaleigu

Verkalýðsfélag Húsavíkur gekk í dag frá kjarasamningi við starfmannaleiguna RIMEC sem er með höfuðstöðvar á Írlandi. Er þetta í fyrsta skipti sem verkalýðsfélag gengur frá samningi við erlenda starfsmannaleigu að því er fram kemur í fréttatilkynningu frá félaginu.

Samkvæmt kjarasamningnum skuldbindur starfsmannaleigan sig til að fara eftir ákvæðum íslenskra kjarasamninga og þá eru starfsmönnum jafnframt tryggð sambærileg réttindi og tryggingar og þekkjast á íslenskum vinnumarkaði. Kjarasamningurinn á við um þá starfsmenn sem koma til með að starfa á vegum starfsmannaleigunnar á félagssvæði Verkalýðsfélags Húsavíkur. Alþingi samþykkti ný lög um starfsmannaleigur í desember sl. og er þetta fyrsti kjarasamningurinn sem stéttarfélag á Íslandi gerir við erlenda starfsmannaleigu eftir gildistöku lagana.