Fólksbifreið lenti á brúarstólpa á Kringlumýrarbraut

Fólksbíll og jeppabifreið lentu í árekstri á Kringlumýrarbrautinni á þriðja tímanum í dag með þeim afleiðingum að fólksbíllinn hafnaði á einum stólpa göngubrúarinnar sem liggur yfir Kringlumýrarbraut. Fólksbíllinn var á leið suður Kringlumýrarbraut þegar óhappið varð en lögregla vildi ekki veita nánari upplýsingar um það hvernig áreksturinn bar að. Betur fór en á horfðist því að sögn sjúkraflutningamanna slasaðist enginn. Tvennt var í fólksbifreiðinni og þrátt fyrir að engin slys hafi orðið á fólki var ökumanni augljóslega mjög brugðið. Báðar bifreiðar voru fluttar á brott með kranabíl og telja má líklegt að fólksbifreiðin sé ónýt. Nokkrar tafir urðu á umferð á leið suður Kringlumýrarbraut sökum árekstursins.