Lífið að komast í samt horf hjá Hjálparsveitinni í Hveragerði

Vel hefur gengið að fylla í skörðin eftir að kviknaði í út frá flugeldum í húsi Hjálparsveitar skáta í Hveragerði. Sveitin hefur hvarvetna mætt miklum velvilja og hefur m.a. fengið GPS-tæki og talstöðvar að gjöf.

Búið er að kaupa fjóra vélsleða fyrir þá sem brunnu og mikið af búnaði er á leiðinni frá öllum heimshornum. Ný vélsleðakerra er í smíðum en hún verður gjöf frá Björgunarsveitinni á Selfossi.

Lengstan tíma mun taka að finna nýtt húsnæði sem hentar þörfum sveitarinnar en vonast er til að það verði samt komið innan 6-9 mánaða. Sveitin er þó að verða starfhæf að nýju í flestar útköll önnur en sérhæfða fjallamennsku og tók hún þátt í tveimur leitarútköllum um helgina.