Sögulegar viðræður um framtíð Kosovo-héraðs

Samninganefndir Serba og Kosovo-Albana koma saman til sögulegs fundar í Vín í Austurríki í dag til að ræða framtíð Kosovo-héraðs. Kosovo-Albanir krefjast þess að héraðið fái sjálfstæði frá Serbíu en Serbar segja Kosovo mikilvægan hluta af ríki sínu og vilja halda einhverri stjórn þar.

Deila Serba og Kosovo-Albana um Kosovo-hérað er erfiðasta deilan sem enn er óleyst eftir blóðbaðið á Balkanskaganum á tíunda áratug síðustu aldar. Sameinuðu þjóðirnar hafa haldið um stjórnartaumana í héraðinu síðan árið 1999 eftir árásir Atlandshafsbandalagsins sem áttu að stöðva herferð serbneskra hersveita gegn Kosovo-Albönum sem vildu tryggja sjálfstæði Kosovo-héraðs.

Kosovo-Albanir eru um níutíu prósent þeirra tveggja milljóna manna sem búa í héraðinu. Síðan þá hafa Sameinuðu þjóðirnar reynt að miðla málum í deilunni og hafa falið Martti Ahtisaari, fyrrverandi forseta Finnlands, að reyna að koma á sáttum.

Sérfræðingar segja miklar vonir bundnar við viðræðurnar og jafnvel talið að hægt verði að finna lausn fyrir árslok. Íbúar í héraðinu eru þó ekki eins vongóðir og óttast eð erfiðlega takið að finna laust sem báðir deiluaðilar sætti sig við.