Tvö þorp á kafi í leðju eftir aurskriður

Tvö þúsund manns kunna að hafa farist í einhverjum mestu aurskriðum í sögu Filippseyja í nótt. Tvö þorp hafa nánast alveg grafist í kaf í leðju eftir ofsaveður undanfarna daga.

Úrhellisrigning hefur verið á austurhluta Filippseyja undanfarnar tvær vikur og viðbúið var að veðurhamurinn myndi enda með ósköpum.

Í morgunsárið dundi svo ógæfan yfir. Þá féll stór aurskriða niður úr fjallshlíð með þeim afleiðingum að nokkur hundruð hús fóru alveg á kaf, þar á meðal leikskóli fullur af börnum. Útlit er fyrir að hundruð hafi farist og fimmtán hundruð manna er enn saknað. Embættismenn á svæðinu sögðust í morgun óttast að tvö þúsund manns hefðu týnt lífi.

Rauði krossinn hefur falast eftir því að bandarískar herþyrlur sem eru við störf í landinu verði þegar sendar á vettvang til að reyna að bjarga því sem bjargað verður.

Nú þegar eru fjölmargir björgunarmenn að störfum, en heill ferkílómetri er þakinn þykkri leðju sem er óstöðug og því gengur hjálparstarfið hægt.

Síðar í dag verður stór flugvél með tæki og hunda til leitar send á hamfarasvæðin, í þeirri von að það takist að finna fólk á lífi í brakinu og aurnum.