Grunaður morðingi framseldur til Bandaríkjanna

Breti sem grunaður er um að hafa myrt bandaríska eiginkonu sína og níu mánaða barn þeirra í úthverfi Boston í Bandaríkjunum og síðan flúið til Bretlands, var í gær framseldur til Boston þar sem hann sætir morðákæru. Neil Entwistle, sem er 27 ára að aldri, neitar allri sök en kona hans og barn fundust látin eftir að hafa verið skotin á heimili þeirra þann 20. janúar síðastliðinn. Líkin fundust tveimur dögum eftir morðin en þann dag hafði vinum verið boðið í matarboð og þegar enginn svaraði, var lögreglan kölluð til. Maðurinn á yfir höfði sér lífstíðarfangelsi verði hann fundinn sekur.