Áfram mótmæli í Pakistan vegna Múhameðsmynda

Lítið lát er á mótmælum í Pakistan vegna skopmyndanna af Múhameð spámanni sem birtar hafa verið í fjölmörgum evrópskum dagblöðum. Mótmælendur kveiktu í morgun í veitingastað Kentucky Fried Chicken í bænum Pashawar í norðurhluta Pakistans ásamt því að brenna bandaríska og danska fánann og hrópa slagorð gegn löndunum. Lögregla reyndi að hafa hemil á um fimm þúsund mótmælendum með táragasi og með því að skjóta af byssum upp í loftið en hún mátti sín lítils gegn fjöldanum. Engar fregnir hafa borist af mannfalli í mótmælunum.