Ár liðið frá morðinu á Hariri

Hundruð þúsunda komu saman í Beirút, höfuðborg Líbanons, í dag til að minnast þess að ár er liðið frá því Rafik Hariri, fyrrverandi forsætisráðherra landsins, var myrtur.

Mikill fjöldi lögreglumanna var á vakt en talið er að um sjöhundruð þúsund manns hafi komið saman á Píslarvættistorginu í Beirút til að taka þátt í athöfninni. Frí var gefið í skólum og mörgum fyrirtækjum lokað til að sem flestir gætu tekið þátt.

Systir Hariris, þingkonan Bahia Hariri, var meðal hinna fjölmörgu sem vottuðu virðingu sína við gröf hans.

Fjöldi fólks veifaði líbanska fánanum og myndum af Hariri. Margir báru einnig fána með áletruðum slagorðum gegn Sýrlandi en ýmis samtök sem beita sér gegn afskiptum Sýrlendinga af Líbanon höfðu hvatt fólk til að mæta á torgið.

Meðal þeirra sem tóku til máls við athöfnina var Saad, sonur Hariris. Sagði hann viðstadda bregðast við ódæði launmorðingjanna og þeirra sem sitja í dimmum bakherbergjum og vilja valda upplausn hjá líbönsku þjóðinni.

Flokkur Saads Hariris er í meirihluta í líbönsku stjórninni en sjálfur hefur hann verið í sjálfskipaðri útlegð undanfarna mánuði af ótta við að verða einnig myrtur.