Skopmyndasamkeppni um Helförina

Íranskt dagblað ætlar að efna til skopmyndasamkeppni um Helförina. Forsvarsmenn blaðsins segja að með því ætli þeir að láta reyna á hversu mikilvægt Vesturlandabúar telji tjáningarfrelsið vera.

Angela Merkel, kanslari Þýskalands, hefur fordæmt yfirlýsingar blaðsins og sagt þær smekklausar og að með þessu væri beinlínis verið að efna til ófriðar.

Gríðarleg spenna ríkir nú á milli múslimalanda og Vesturheims vegna myndbirtinganna af Múhameð spámanni. Uffe Elleman Jensen, fyrrverandi utanríkisráðherra Dana, sagði í gær að ritstjóri Jótlandspóstsins ætti að segja af sér vegna málsins.

Jótlandspósturinn greindi frá því í morgun að Sameinuðu þjóðirnar og Evrópusambandið hefðu tekið höndum saman með 57 íslömskum ríkjum til að reyna að lægja öldurnar í deilunni sem virðist sífellt vera að harðna. Samtökin tvö og ríkin fordæma ofbeldisfull mótmæli múslima og hvetja þá til að sýna stillingu.

Teikningarnar umdeildu hafa birst í dagblöðum og tímaritum í sextán löndum, samkvæmt frétt sem AP fréttastofan sendi frá sér í gær. Ísland er þar á meðal ásamt Danmörku og Grænlandi. Athygli vekur að fréttastofan telur Noreg ekki með.

Framkvæmdastjórn Íransstjórn hefur ákveðið að hætta viðskiptum við fyrirtæki í Danmörku í mótmælaskyni. ESB hefur fordæmt ákvörðunina og íhugar frekari viðbrögð við ákvörðun Íransstjórnar.

George Bush Bandaríkjaforseti hringdi í gær í Anders Fogh Rasmussen, forsætisráðherra Dana og tjáði honum stuðning sinn við málstað þeirra um að biðjast ekki afsökunar á myndbirtingunni. Þúsundir mótmælenda brenndu eftirlíkingu af Bush, í Pakistan í dag en mótmælendurnir vildu meina að Bush stæði á bak við birtingu skopteikninganna.

Íranar sem og Pakistanar vilja að öll viðskiptasamningum verði rift við Dani og öll þau lönd sem birt hafa myndina af Múhameð. Öfgafullir trúarleiðtogar hafa hótað hryðjuverkum í Danmörku vegna málsins og hvetja liðsmenn til að ráðast á Dani hvar sem þá er að finna.