Fær stærsti árgangur sögunnar inn í framhaldsskólana?

Í vor útskrifast stærsti árgangur Íslandssögunnar úr grunnskólum landsins. Framkvæmdastjóri Heimilis og skóla, landssamtaka foreldra, hefur áhyggjur af því hvort framhaldsskólarnir rúmi alla þá sem óska eftir inngöngu.

Elín Thorarensen, framkvæmdastjóri Heimilis og skóla, segir mikla uppbyggingu hafa verið í málefnum grunnskólanna en að hana hafi skort þegar kemur að framhaldsskólunum á sama tíma og útskrifuðum nemendum í grunnskólum hefur verið að fjölga og hærra hlutfall þeirra óskar eftir plássi í framhaldsskólum. Elín hefur áhyggjur af þeirri stöðu sem skapast þegar um þrjú hundruð fleiri óska eftir framhaldsskólaplássi heldur en í fyrra og óttast að það fái ekki allir pláss í framhaldsskólunum í haust af þeim sem eftir því óska. Undanfarin ár hafi það gengið erfiðlega og einkum hafi þeir sem áður hafi flosnað úr námi átt erfitt með að fá inngöngu. Þá hafi sumir ekki fengið svör við því hvort þeir fái inngöngu fyrr en í ágúst. Þó hefur það tekist á endanum að veita öllum inngöngu og vonar Elín að það takist jafnframt nú.

Elín segir að auka þurfi rými í framhaldsskólum enda eigi aðgangur að þeim að vera frjáls. Ríkisvaldið sé þó að vinna í málinu og hefur menntamálaráðuneytið nýverið skipað starfshóp sem skoða á úrræði til að fjölga plássum í framhaldsskólum. Aðspurð um þátt stjórnvalda í að auka pláss í framhaldsskólum segir Elín að það hafi ekki gengið nógu hratt að hennar mati. Á hinn bóginn sé fjöldi umsókna um framhaldsskólavist mismikill milli ára. Í því samhengi tekur Elín fram að það séu toppar og lægðir og að erfitt sé að anna eftirspurn þegar fjöldi umsókna um inngöngu í framhaldsskóla séu margar.