Óskað eftir gæsluvarðhaldi yfir karli og konu

Lögreglan í Reykjavík kom í gær upp um umsvifamikla kannabisræktun í atvinnuhúsnæði skammt frá aðalstöðvum lögreglunnar. Óskað verður eftir gæsluvarðhaldsúrskurði yfir karli og konu sem handtekin voru í gærkvöldi.

Auk þess hefur töluvert af fíkniefnum fundist við húsleitir í tengslum við rannsóknina og er að minnsta kosti tvennt í haldi lögreglu vegna rannsóknarinnar. Talið er að í það minnsta 200 vel þroskaðar plöntur hafi verið í húsinu, en það er ekki vitað nákvæmlega þar sem ekki er lokið við að fjarlægja allar plönturnar og vega þær og meta. Þær munu vera það stálpaðar að þær voru farnar að gefa af sér afurðir til neyslu. Það var lögreglumaður á frívakt sem tók eftir torkennilegri lykt frá húsinu þegar hann var þar á kvöldgöngu í fyrrakvöld og við nánari athugun í gær kom þetta í ljós.