Frumvarp til breytinga á lögum um stjórn fiskveiða

Samkvæmt nýju frumvarpi sjávarútvegsráðherra til breytinga á lögum um stjórn fiskveiða er lagt til að sett verði hámark á samanlagða krókaaflahlutdeild þannig að enginn hafi yfir meiru að ráða en 6% af krókaaflahlutdeild í þorski, 9% krókaaflahlutdeild í ýsu og 6% af heildarverðmæti krókaaflahlutdeildar.

Samkvæmt gildandi ákvæði eru settar takmarkanir á samanlagða aflahlutdeild fiskiskipa í eigu einstakra aðila, einstaklinga eða lögaðila, eða í eigu tengdra aðila í fimm helstu tegundum botnfisks, auk síldar, loðnu og úthafsrækju og miðast hámarkið við 12% í þorski og 35% í karfa en 20% í öðrum tegundum. Þá segir í lögunumað samanlögð aflahlutdeild fiskiskipa megi aldrei nema meira en 12% af heildarverðmæti aflahlutdeildar allra tegunda sem sæta ákvörðun um heildarafla.

Fyrrgreind takmörkun tekur einnig til krókaaflahlutdeildar en hér er lagt til að auk þessa verði sétt sérstakt hámark á samanlagða krókaaflahlutdeild fiskiskipa í eigu einstakra aðila, einstaklinga eða lögaðila, eða í eigu tengdra aðila.

Ennfremur er lagt til í frumvarpinu að unnt verði með rafrænum hætti að flytja aflamark milli fiskiskipa á einfaldari hátt en nú tíðkast.

Einnig er lagt til að fella úr gildi veiðiskyldu úthafsrækju og að veiðigjald miðist við afla en ekki úthlutaðar aflaheimildir. Þetta er lagt til vegna erfiðleika sem séu uppi í veiðum og vinnslu úthafsrækju.