Pattstaða í viðræðum um hlut borgarinnar í Landsvirkjun

Pattstaða er í viðræðum ríkisins við Reykjavíkurborg og kaup ríkisins á hlut borgarinnar í Landsvirkjun. Viðræðum um málið hefur verið frestað um óákveðinn tíma vegna deilu um verðmat á fyrirtækinu.

Viljayfirlýsing um sölu á hlut Reykjavíkurborgar og Akureyrar í Landsvirkjun til ríkisins var undirrituð 17. febrúar í fyrra. Síðastliðið vor hófust svo samningaviðræður um hugsanlegt kaupverð og átti þeim að vera lokið fyrir árslok. Hins vegar hafa deilur um kaupverðið leitt til þess að málið er enn óleyst.

Gerð var grein fyrir stöðu viðræðnanna á borgarráðsfundi í dag og þar töldu fulltrúar allra lista í borgarstjórn að fyrirliggjandi verðmat á Landsvirkjun væri óviðunandi. Fyrirtækið er metið á um 56 milljarða króna og á borgin um 45 prósent í því en Akureyrarbær um fimm prósent.

Steinunn Valdís Óskarsdóttir borgarstjóri segir þrátt fyrir þettaað áfram sé stefnt að því að borgin fari út úr fyrirtækinu. Þessari viðræðulotu sé lokið í bili en svo eigi menn eftir að ákveða hvenær næsta lota hefjist. Það sé ómögulegt að segja hvenær það verði. Aðspurð segir Steinunn Valdís að Reykjavíkurborg sé búin að afgreiða málið fyrir sitt leyti. Verðið sem liggi á borðinu sé einfaldlega of lágt og hún telji ekki rétt að selja hlutinn á því verði. Borgin verði líka að velja sölutímann sjálf.

Fulltrúar Sjálfstæðisflokksins segja að ekki sé samstaða innan meirihlutans í borgarstjórn að selja eignarhlut borgarinnar, en Vinstri - grænir eru algerlega andvígir einkavæðingu Landsvirkjunar eins og ríkisstjórnin hafi lýst yfir vilja til að gera þegar hún eignast fyrirtækið. Meirihluti borgarráðs leggur áherslu á samfélagslegt eignarhald orkufyrirtækja í bókun sinni í dag.

Steinunn Valdís segir að þetta hafi verið dregið fam til þess að varpa ljósi á það að það sé í raun og veru ekki Reykjavíkurborg sem breyti forsendum í viðræðunum heldur telji borgaryfirvöld að yfirlýsingar ríkisstjórnarinnar hafi verið óheppilegar og ótímabærar og hafi truflað viðræðuferlið. Það sé yfirlýst stefna borgaryfirvalda að Orkuveita Reykjavíkur í samfélagslegri eigu allra borgarbúa.

Iðnaðar- og viðskiptaráðuneytið fer með málið fyrir ríkið og Valgerður Sverrisdóttir iðnaðar- og viðskiptaráðherra segist ekki vilja tjá sig um málið að sinni þar sem hún hafi fengið erindi frá borgarstjórn um að viðræðum hafi verið slitið.