Olíuleiðsla í Írak sprengd

Sprenging varð í dag í olíuleiðslu sem flytur hráolíu frá olíusvæðum í Kirkuk í Írak til olíuhreinsunarstöðvar í höfuðborginni Bagdad. Þetta er aðal olíuleiðslan á þessu svæði og segir íraska lögreglan að uppreisnarmenn beri ábyrgð á sprengingunni.

Olíustreymi um leiðsluna stöðvaðist og þykkur, dökkur reykur steig upp úr leiðslunni á tveimur stöðum. Slökkviliðsmenn áttu fullt í fangi með að slökkva þá elda sem hafa logað í kjölfarið. Óvíst er hversu langan tíma það tekur að gera við leiðsluna, sem tryggir olíu til rafmagnsframleiðslu í Bagdad.