Eva komin á nýjan stað

Ein af rótgrónustu tískuvöruverslunum landsins, Eva, hefur flutt sig um set. Verslunin hefur ávallt verið staðsett á Laugaveginum eða síðan hún var stofnuð árið 1969 af verslunarmógúlnum Mörtu Bjarnadóttur.

Árið 1999 keypti verslunarkeðjan NTC búðina og fluttist hún á Laugaveg 91 og var þá staðsett inn af versluninni Gallerí Sautján. Búðin er nú flutt á Laugaveg 89, en þar voru áður Smash, Sautján Jeans og nú síðast Kúltúr Menn, sem er flutt upp í Kringlu. Vöruúrvalið er það sama og var en merkin Bruunz Bazar, Vent Couvert, DKNY, Gérard Darel og Nicole Farhi fylla veggi búðarinnar. Einnig eru nýir skartgripir frá Dolce & Gabbana fáanlegir í versluninni.