Íslendingar óháðir Bandaríkjamönnum

Geir H. Haarde neitar því að Bandaríkin myndu hafa óeðlileg áhrif á atkvæðagreiðslu Íslands í Öryggisráði Sameinuðu þjóðanna ef Ísland næði kjöri. Þetta kom fram í máli utanríkisráðherra hjá Félagi Sameinuðu þjóðanna í gær.

Utanríkisráðherra segir óhjákvæmilegt að taka tillit til utanríkisstefnu nágranna okkar en að endanleg ábyrgð liggi alltaf hjá Íslendingum.

Ef Ísland færi inn í Öryggisráðið myndi þurfa að fjölga tímabundið starfsfólki í fastanefndinni og til greina kæmi að setja upp gagnagrunn íslenskra sérfræðinga um öryggis- og alþjóðamál sem hægt væri að leita til. Ráðherra sagðist þó ekkert vera farinn að íhuga stöðuveitingar fastafulltrúa eða starfsfólks sem bætt yrði við hjá fastanefndinni, að svo stöddu.