Spá áframhaldandi hárri verðbólgu

Verðbólgan mælist nú 4,5 prósent og er yfir verðbólgumarkmiðum Seðlabankans 23. mánuðinn í röð. Ekki nóg með það heldur hefur verðbólgan verið yfir efri þolmörkum bankans í sjö mánuði samfleytt. Og það er ekki útlit fyrir að þetta breytist ef marka má spár greiningardeilda KB banka og Íslandsbanka.

Greiningardeild KB banka hefur litla trú á að verðbólga fari minnkandi á næstunni. Þvert á móti segja starfsmenn hennar allar líkur á að verðbólguhraðinn fari vaxandi á næstu mánuðum enda hafi dregið mjög úr líkum á að verðbólgan fari undir þolmörk Seðlabankans.

Í umsögn Greiningardeildar Íslandsbanka segir svo að fátt bendi til að verðbólgan minnki á næstu mánuðum.

Það er helst að Greiningardeild Landsbankans dragi úr spám um mikla verðbólgu. Þar spá menn því að vísitala neysluverðs hækki minna í næstu mælingu en þeirri síðustu. Næsta verðbólguspá bankans birtist í næstu viku og þá kemur í ljós hvort þeir verði á sömu skoðun og greiningardeildir hinna bankanna eða ekki.