Cheney ekki með tilskilið leyfi á veiðum

Dick Cheney, varaforseti Bandaríkjanna, virðist ekki laus allra mála vegna slyss um helgina þar sem hann skaut á veiðifélaga sinn á kornhænuveiðum. Í ljós hefur komið að Cheney hafði ekki tilskilið veiðileyfi þegar hann fór til veiða með milljarðamæringnum Harry Whittington sem hann svo skaut í andlitið og bringuna fyrir slysni. Búist er við að Cheney fái viðvörun vegna málsins en ekki sekt. Hvíta húsið hefur verið harðlega gagnrýnt fyrir að greina ekki strax frá málinu, en sagt var frá því í dagblaði í Texas þar sem Cheney var við veiðar.