Hinn íslamski heimur hafi misskilið hugmyndir Dana

Hinn íslamski heimur hefur misskilið hugmyndir Dana um trú og spámanninn Múhameð, sagði Anders Fogh Rasmussen, forsætisráðherra Danmerkur, eftir fund með hófsömum múslímum í Danmörku í gær.

Á fundinum var rædd sú staða sem upp er komin vegna skopmyndanna af Múhameð spámanni sem fyrst voru birtar í Jótlandspóstinum og síðar í fjölda annarra evrópskra blaða. Rasmussen vildi ekki tilgreina hverjir hefðu dregið upp ranga mynd af Danmörku en orðin ráðherrans eru sögð hafa beinst gegn róttækum múslímum í Danmörku. Ráðherrann áformar fleiri fundi með múslímum og innflytjendum vegna málsins.