Megrunarráð Nietzsches

Skrif bandaríska leikstjórans og háðfuglsins Woody Allen um meinta matreiðslubók þýska heimspekingsins Friedrich Nietzsche hafa vakið sterk viðbrögð lesenda en grein hans sem birtist í júlíhefti tímaritsins The New Yorker ferðast eins og eldur í sinu um óravíddir netsins.

Í grein sinni, Svo át Zaraþústra kveðst Allen hafa rambað á uppskriftabók sem kennd er við spekinginn þegar hann var á ferð í Heidelberg og birtir í framhaldinu brot úr þessu merka riti og þar á meðal nokkrar uppskriftir, til dæmis af hentugri samsetningu á morgunverði.

Allen reifar heimspekisöguna út frá sjónarhóli matgæðingsins í pistli sínum og minnist til dæmis á það þjóðþrifaverk René Decartes sem aðskildi efni og anda en af því leiðir að líkaminn getur gúffað í sig að vild á meðan hugurinn er stikkfrír í vissu sinni að óhófið komi sér ekkert við.

Leikstjórinn fleytir kellingar á nokkrum af stærstu spurningum heimspekinnar og kinkar ítrekað kolli til skrifa Nietzsches á sinn óborganlegan hátt. Stærstu spurningunni er þó ósvarað: Ef lífið er merkingarlaust - hvaða þýðingu hefur þá stafasúpa?