Harmar ákvörðun síldarverksmiðjunnar á Raufarhöfn

Verkalýðsfélag Húsavíkur harmar ákvörðun Síldarvinnslunnar um að hætta starfsemi loðnuverksmiðju á Raufarhöfn en öllum starfsmönnum verksmiðjunnar hefur verið sagt upp frá og með næstu mánaðarmótum. Að því er fram kemur í yfirlýsingu frá verkalýðsfélaginu þá hefur loðnuverksmiðja gegnt mikilvægu hlutverki í atvinnuuppbyggingu Raufarhafnar og veitt fjölmörgum atvinnu.

Þá hefur sveitarfélagið sett verulegt fjármagn í hafnarframkvæmdir ekki síst til að styrkja starfsemi verksmiðjunnar á staðnum og bæta þar með samkeppnisstöðu hennar miðað við aðrar sambærilegar verksmiðjur. Verkalýðsfélag Húsavíkur telur Síldarvinnsluna bera ákveðna ábyrgð á lokun verksmiðjunnar og hvetur því fyrirtækið til að koma að því með heimamönnum að finna húsnæði verksmiðjunnar á Raufarhöfn nýtt hlutverk.

Fréttatilkynning!

Starfsmönnum Síldarvinnslunnar á Raufarhöfn sagt upp störfum:

Verkalýðsfélag Húsavíkur ályktaði í dag um ákvörðun Síldarvinnslunnar að hætta starfsemi á Raufarhöfn.

Ályktun

"Verkalýðsfélag Húsavíkur harmar ákvörðun Síldarvinnslunnar um að hætta starfsemi í loðnuverksmiðju fyrirtækisins á Raufarhöfn. Starfsmönnum hefur verið sagt upp frá og með næstu mánaðamótum.

Loðnuverksmiðjan hefur í gegnum tíðina gegnt mikilvægu hlutverki í atvinnuuppbyggingu á Raufarhöfn og veitt fjölmörgum atvinnu. Þá hefur sveitarfélagið sett verulegt fjármagn í hafnarframkvæmdir ekki síst til að styrkja starfsemi verksmiðjunnar á staðnum og bæta þar með samkeppnisstöðu hennar miðað við aðrar sambærilegar verksmiðjur.

Verkalýðsfélag Húsavíkur telur Síldarvinnsluna bera ákveðna ábyrgð á lokun verksmiðjunnar og hvetur því fyrirtækið til að koma að því með heimamönnum að finna húsnæði verksmiðjunnar á Raufarhöfn nýtt hlutverk."

Húsavík 31. mars 2006

Fh. Verkalýðsfélags Húsavíkur

Aðalsteinn Á. Baldursson

4646600