Sumargleðin saman aftur?

"Þetta eru náttúrlega enn þann dag í dag skemmtilegustu menn þjóðarinnar. Ef hægt væri að líkja þeim við einhverja þá væru það bara Frank Sinatra, Dean Martin og Sammy Davis jr. Það er þess vegna bara heiður fyrir okkur ef við færum að vinna saman," segir Einar Bárðarson hjá Concert þegar hann er spurður um þrálátan orð­róm þess efnis að Sumargleðin ætli sér að koma aftur saman í sumar.

Þekktustu nöfn Sumargleðinnar eru þeir Hemmi Gunn, Þorgeir Ástvalds og Raggi Bjarna og þeir hafa fundað með Einari um þetta mál. "Við höfum átt nokkra fundi og á milli hláturskastanna hefur Sumargleðin komið til tals á þeim fundum. Meira get ég ekki sagt um málið enda ekkert enn verið ákveðið í þeim efnum," segir Einar.

Auk þeirra sem áður voru nefndir komu fjölmargir við sögu hjá Sumargleðinni þegar hún var upp á sitt besta á áttunda og níunda áratugnum. Þar má meðal annarra nefna Ómar Ragnarsson og Bessa heitinn Bjarnason. Yfir tuttugu ár eru síðan Sumargleðin fór síðast um landið en Einar telur ólíklegt að þessar kempur hafi nokkru gleymt. Fari svo að Sumargleðin verði endurvakin má líklegt telja að það verði gert í kringum verslunarmannahelgina.