Róluvöllurinn innblásturinn

Nýtt tónverk eftir Þorkel Sigurbjörnsson sem hlotið hefur nafnið Sumartónar er runnið undan rifjum æskuminninga tónskáldsins.

Verkið verður frumflutt af Sinfóníu­hljómsveit Íslands á síðustu tónleikum sveitarinnar í sumar.

Verkið var samið að beiðni hljóðfæraleikarans og hljómsveitar­stjórans, Vladimirs Ashkenazy en hann mun koma fram að minnsta kosti einu sinni ári til að stjórna hljómsveitinni.

Þorkell sótti innblástur í verkið af æskudögum sínum á róluvellinum við Freyjugötu en þaðan segist hann eiga góðar minningar. "Þarna voru alltaf mikið af leiktækjum, rólum, söltum og sandkössum, rennibrautum, klifurgrind og annað sem var síðan ekki nothæft á veturna. Þarna lékum við krakkarnir okkur líka án leiktækja í fallinni spýtu, eitt stikk og sto, auraharki, fram fram fylking eða bófahasar og svo framvegis. Í leikjum sem engin kann lengur," segir Þorkell.

"Við vorum yfirleitt góðir krakkar. Það var lítið um hrekkjusvín í þeim hópi sem ég tilheyrði sem krakki, sem betur fer. Stundum kom Siggi gamli og spilaði fyrir okkur á munnhörpu, og hoppaði eitthvað, sem hann kallaði karíóka. Leiðinlegust var löggan í hverfinu sem vildi koma okkur krökkunum í hús samkvæmt einhverju klukkuslagi seint á kvöldin. Svo var hægt að læðast út fyrir borgarmörkin, yfir Hringbraut og í Tívolí í Vatnsmýrinni. Þaðan komu líka alls konar sumartónar, ef heppnin var með".

Til fulltingis við Sinfóníuhljómsveit Íslands mun leiðandi selló­leikari Sinfóníuhljómsveitarinnar, Bryndís Halla Gylfadóttir, leika sellókonsert eftir Edward Elgar. Bryndís hefur verið virkur þátttakandi í íslensku tónlistarlífi undanfarin ár, jafnt sem einleikari og í kammertónlist. Auk þess að leika á tónleikum hér á landi reglulega spilar Bryndís oft á tónleikum bæði í Evrópu og í Asíu. Um selló­konsert­verkið segir Árni Heimir Ingólfsson tónlistarfræðingur í efnisskrá, "sellókonsertinn er magnþrungin tónsmíð, full af ástríðu og trega, eins og Elgar líti um öxl og minnist þess sem áður var. Hann hefst á tignarlegu eintali ástríðu og trega, sem minnir helst á dramatískt resítaív án orða og snýr aftur á lykilstöðum í verkinu".

Tónleikarnir fara fram í Háskólabíói fimmtudaginn 15. júní og hefjast klukkan 19:30.